Sytse van der Werf earste doarpsdichter
Sytse van der Werf earste doarpsdichter fan Achtkarspelen
Bûtenpost - Sytse van der Werf, âld-ynwenner fan Achtkarspelen, is op 20 maart keazen as earste doarpsdichter fan Achtkarspelen. Sân poerbêste kandidaten ha freedtejûn yn it sfearfolle tsjerkje fan Twizel meidien oan de ferkiezing foar de doarpsdichter fan Achtkarspelen.
Nei it stimmen op ynternet en yn ‘e tsjerke kamen trije favoriten nei foaren: Adri de Boer, Ate Grypstra en Sytse van der Werf. De sjuery, dy’t bestie út Gerbrig Vreeling, dosint Frysk by de Afûk, Joop Atsma, Twadde Keamerlid en boargemaster Tjeerd van der Zwan, hat úteinlik keazen foar de tagonklike teksten en de alsidigens fan Sytse van der Werf.
Om it kulturele en literêre libben yn ús gemeente te stimulearjen hat de gemeente Achtkarspelen in ferkiezing útskreaun foar in doarpsdichter. De doarpsdichter skriuwt minimaal fiif gedichten it jier, wêrfan minimaal trije yn it Frysk. Hy draacht de gedichten foar of sjongt syn lieten by spesjale gelegenheden of eveneminten.
Alle gedichten of lietteksten wurde pleatst op de gemeentlike webside en yn De Feanster. De Wâlddichter / Wâldsjonger is oansteld foar twa jier en nei ôfrin fan dizze perioade komt der in dichtbondel mei alle gedichten.
Bron: Gemeente Achtkarspelen (23-03-2009)
